Монголчууддaa хүргэх үг

Элгэн төрлийн холбоотой

Эрин үеийн монголчуудад

Эх нутгаараа нэгдэхийг

Энүүхэн тунхагаар батлав.

    Уриа тунхаг нийтлэгдэж

    Уугуул нутагтаа түгээсэй.

    Улсынхаа хязгаарыг ч давж

    Улам ч эрчимтэй өрнөөсөй.

Үлэмжийн сайхан нутагтай

Үзэсгэлэн төгс байгальтай

Үндэсний ихээхэн баялагтай

Өнөр, баян монголчууд аа

     Эрхэс тэнгэрийн ивээлтэй

     Эртний Монголын голомт

     Эзэн Чингисийн өлгий

     Эх нутагтаан нэгдэгтүн

Тав, зургаан хэсэг газраа

Тасарч салсан монголчууд

Тансаг сайхан нутгийнхаа

тахил шүтээнд нэгдэгтүн.

      Алдарт монгол орондоо

      Аргалын гал дүрэлзүүлсэн

      Асар эртний голомтондоо

      Ариун сэржмээн өргөгтүн.

Өвөрмонгол овогтнуудын

Өөртөө засах орныхон ч

Өвөг дээдсийн голомтод

Өнө мөнхдөө нэгдэгтүн

     Хүннү агсан монголчуудын

     Хчийг нэгтгэх уриан дуу

     Хүмүүсийн оюун сэтгэлийг

     Хөдөлгөн сэргээх болтугай.

Хөх тугаан мандуулсан

Хөх Монголын хойч үе

Хөх толботой мэндэлсэн

Хөвгүүд охидын сонорт

      Бурхан тэнгэрийн ивээлээр

      Бүхэлдүү үлдээд сарнин буй

      Буриад монгол овогтнууд ч

      Бүгдээр Монголдоо нэгдэгтүн.

Харийн нутаг суурьшсан

Халимаг нэртэй монголчууд

Халуун элгэн нутагтаан ч

Хамтарч бүгдээр нэгдэгтүн

     Түмэн жилийн уламжлалт

     Тува омгийн монголчууд

     Төрөлх нутагтаа нэгдэж

     Түүхэн алдраа сэргээгтүн

Монгол нэртэй монголчууд

Мөнх сарьдгийн өндрөөс ч

Морьтой, малтайгаа, явган ч

Монгол нутагтаан нэгдэгтүн.

     Алтайн өндөр уулсын

     Ар, өврөөр оршин суугч

     Асар эртний монголчууд ч

     Анхны нутагтаан нэгдэгтүн

Алийн болгон бид бүгдээрээ

Ар, Өвөрмонгол, Буриадууд

Аягын чинээ Халимаг, Тува

Алгын чинээхэн Монгол болж

Эмх цэгцгүйхэн хуваагдаж

Энэ тэр ч улс гүрнүүдийн

Элэг бөөрөнд наалдацгааж

Эмзэглэн гаслаж суух юм?

      Өвөг дээдсийн өвлүүлсэн

      Өргөн уудам нутгаан

      Өнө мөнхөд нэгтгэхийн тулд

      Өөрсдөө тэмцэл өрнүүлье

Герман, Вьетнам, хятадын

Гашуун туршлагат жишгийн

Гандан бууршгүй тэмцлээр

Газар нутагтаа нэгтгэгтүн

     Хэтэрхий тайван сууцгааж

     Хэдэн үе өнгөрүүлсэн гэж

     Хэн ч биднийг өрөвдөхгүй

     Хэзээ ч биднийг савдаг нэгтгэхгүй

Их агсан Монгол үндэстний

Ирээдүйн залгамж үеийнхэн

Эв түнжингээ бататгаж

Элгэн садандаан нэгдэгтүн

    Тархай саланги хэвээр бол

    Тав, гуравхан зуугаад жилд

    Та, бидний овог, үндэс мөхөх

    Таамнал буйг анхаарагтун

Эрхэмсэг ноёд хатагтай нар

Эгэл Монгол овогтнуудаа

Энэ онолын үзэл таамналын

Эгнэгт үнэнийг тунгаагтун

    Элгэн төрийн уялдаатай

    Эртний монгол угсаатнууд

    Эмх замбараагүй уусч буйг

    Энгийн нздээр толилогтун

Эгзэгтэй энэхэн цаг үед

Эх оронч та бүхний сонорт

Энүүхэн уриа хүрч

Эрэгцүүлэн тунгаах биз ээ

     Язгуур угсаатныг маань хилсдүүлж

     Ямар ч эрдэмтэн сэхээтнийг

     Янз бүрийн аргаар гүтгүүлж

     Яллуулж байсныг ч санагтун

Буруу номтны сургаалаар

Бурхан шашнаа устгаад

Буянт олон лам нараан ч

Буудаж хороосон удаа ч бий.

Үнэн алдарт буурлуудыг

Үндэсний үнэр ханхлуулсан

Үзэл суртлын эсэргүү гээд

Үгүй хийсэн үесүүд ч бий.

    Үүний учрыг сөхөж үзвэл

    Үндэсний дээрэнгүй бодлогын

    Үнэн, зөв эх оронч үзэлтэй

    Үндэсгүй хутгасан нь тодорхой

Хилс хэрэгт хэлмэгдэхээс айж

Хэтэрхий удаан сууснаараан

Хэний ч сэтгэл тайвшрахгүй

Хэзээ ч монголчууд нэгдэхгүй

    Аль нэгэн улс гүрнүүдийн

    Ар, Өвөрт зүүгдэн оршиж

    Асар олон жилийн туршид ч

    Амьдран буй монголчуудаа

Эзэн Чингисийн нэгтгэсэн

Эртний Монгол орон маань

Эдүгээ хүртэлх хугацаанд

Элэг эмтэрмээр жижгэрчээ

    Хөх мөнгөн тэнгэр маань

    Хөрст дэлхийн баялаг маань

    Хүн амын олонх нь ч

    Хүний нутагт тасарчээ.

Хөдөө, суурин хотоороо

Хүнтэй, малтайгаа, газартайгаа

Хүчирхэг их гүрнүүдийн

Хүчинд автан хуваагдахдаа

   Айл хөршөөсөө сарнисаар

   Ах, дүүгээсээ ч холдож бид.

   Аз жаргалаа гээгдүүлсээр

   Амьдралаа ч их үрэгдүүлжээ.

Чингис хааны хойч үеийн

чин зоригт монголчуудаа

Чинээлэг түүхэн амьдралаа

Чинагшид сэргээхийг хичээгтүн.

    Эх нутгаан хуваагдуулж

    Эмх цэгцээн алдсан боловч

    Эргэж нэгдэхүйн тэмцлийг

    Энүүхэн үеэс өрнүүлэгтүн.

Энд тэнд суурьшин байгаа

Эдүгээ үеийн залуучууд ч

Эв түнжингээ сэргээцгээж

Элгэн төрөлдөө ойртогтун

Эртний удмын язгууртан

Эрин цагийн ахмадууд ч

Энхрий хайрт эх орноо

Эргэн санаж нэгдэгтүн

    Яахаараа манай монголчууд

    Янз бүрийн улсад хуваагдаж

    Ядахдаан ч нэгдэж чадалгүй

    Яваандаа мөхөхөд хүрэх юм.

Галав юүлсэн ч салшгүй

Газар дэвсгэрийн үргэлжид

Гайхам унаган байгальтай

Ганц нутагтайгаан санагтун

     Хэвлийд бүрэлдсэн хэлбэр

     Хэв заншил ч ав адилхан

     Хэл соёл ч яг нэгтээгээн

     Хэзээ ч бүү умартагтун 

Буруу номнолд автагдаад

Бутарч будилсан хэдий ч

Бурхан тэнгэртээ залбиран

Буй чадлаараа эвлэрэгтүн

    Унасан газрынхаа ариуханд

    Угаасан усныхаа тунгалагт

    Удам угсаагаа залгамжлахаар

    Уугуул нутагтаан нэгдэгтүн

Яс цусаараа нэг удамтай

Язгуур үндэсний уялдаагаар

Ямагт эв хамт байсныгаа ч

Ямар ч үед бүү мартагтун

    Бүх дэлхийн монголчуудаа

    Бүрэн эрхээрээ найрамдаж

    Бүхэл нэгэн улсаа байгуулан

    Бүгдээр нутагтаа нэгдэгтүн

              Мэдээллийн эх сурвалж: Инфо сонин. УБ 2002.02.10